ബഹളമുണ്ടാക്കി തടസ്സപ്പെടുത്തിയാലും സംസാരിച്ചിട്ടേ മടങ്ങൂ, എന്നെ തടസ്സപ്പെടുത്തി കഴിഞ്ഞാൽ മറ്റാരെയും സംസാരിക്കാൻ അനുവദിക്കില്ല’: സഭയിൽ മുഖ്യമന്ത്രി

നിയമസഭയിൽ കിഫ്ബിയുമായി ബന്ധപ്പെട്ട ചർച്ചകൾക്കിടെ സഭയിൽ തടസ്സം സൃഷ്ടിച്ച പ്രതിപക്ഷത്തിനു നേരെ തിരിഞ്ഞ് മുഖ്യമന്ത്രി വി. ഡി. സതീശൻ. തന്നെ സംസാരിക്കാൻ അനുവദിച്ചില്ലെങ്കിൽ മറ്റാരെയും സംസാരിക്കാൻ അനുവദിക്കില്ലെന്ന് മുഖ്യമന്ത്രി പറഞ്ഞു.

ബഹളമുണ്ടാക്കി തടസ്സപ്പെടുത്തിയാലും തന്റെ വാദങ്ങൾ അവതരിപ്പിച്ച ശേഷമേ മടങ്ങുകയുള്ളൂവെന്നും മുഖ്യമന്ത്രി പറഞ്ഞു. കിഫ്ബി പദ്ധതികൾ സംസ്ഥാനത്തിന് വലിയ സാമ്പത്തിക ബാധ്യതയാണ് സൃഷ്ടിച്ചതെന്നും അദ്ദേഹം സഭയിൽ ആരോപിച്ചു. ഇതോടെ സ്പീക്കർ തിരുവഞ്ചൂർ രാധാകൃഷ്ണൻ ഇടപെട്ട് സഭയിലെ രംഗം ശാന്തമാക്കാൻ ശ്രമിച്ചു.

മുൻ സർക്കാരിന്റെ കാലത്ത് തിരഞ്ഞെടുപ്പിന് തൊട്ടുമുൻപ് പ്രഖ്യാപിക്കുകയും തറക്കല്ലിടുകയും ചെയ്ത പല പദ്ധതികളുടെയും ടെൻഡർ നടപടികളും അനുമതികളും പൂർത്തിയായത് പുതിയ സർക്കാർ അധികാരത്തിലെത്തിയ ശേഷമാണെന്ന് മുഖ്യമന്ത്രി പറഞ്ഞു. ഇതിന് ഉദാഹരണമായി കോഴിക്കോട്ടെ 272 കോടി രൂപ ചെലവിൽ നടപ്പാക്കുന്ന ഓർഗൻ ട്രാൻസ്പ്ലാന്റേഷൻ ഹോസ്പിറ്റൽ പദ്ധതി അദ്ദേഹം ചൂണ്ടിക്കാട്ടി.

ഫെബ്രുവരിയിൽ തറക്കല്ലിട്ട പദ്ധതിയുടെ ടെൻഡർ നടപടികൾ ഏപ്രിലിലും അനുമതി ഓഗസ്റ്റിലും പൂർത്തിയാക്കിയെന്നും വർക്ക് ഓർഡർ സെപ്റ്റംബറിലാണ് നൽകിയതെന്നും മുഖ്യമന്ത്രി വിശദീകരിച്ചു.