×

നിലയ്ക്കൽ–പമ്പ ബസ് നിരക്ക് കുറയ്ക്കണം; സൗജന്യ സർവീസിന് ഭക്തജന സംഘടനകളെ അനുവദിക്കണമെന്ന് അനൂപ് ആന്റണി

ശബരിമല തീർത്ഥാടനത്തോടനുബന്ധിച്ച് നിലയ്ക്കൽ–പമ്പ റൂട്ടിൽ കെഎസ്ആർടിസി ഈടാക്കുന്ന അധിക നിരക്ക് കുറയ്ക്കണമെന്ന് ബിജെപി സംസ്ഥാന ജനറൽ സെക്രട്ടറി അനൂപ് ആന്റണി. സാധാരണ യാത്രാനിരക്ക് മാത്രം ഈടാക്കാൻ സർക്കാർ തയ്യാറാകണമെന്നും അതിന് കഴിയാത്തപക്ഷം തീർത്ഥാടകർക്ക് സൗജന്യ ബസ് സർവീസ് നടത്താൻ സന്നദ്ധരായ ഭക്തജന സംഘടനകളെ ചുമതലപ്പെടുത്തണമെന്നും അദ്ദേഹം ആവശ്യപ്പെട്ടു. ഇക്കാര്യങ്ങൾ ഉന്നയിച്ച് ഗതാഗത മന്ത്രി സി.പി. ജോണിന് നിവേദനവും നൽകി.

നിലയ്ക്കലിൽ നിന്ന് പമ്പയിലേക്കുള്ള 22 കിലോമീറ്റർ യാത്രയ്ക്ക് ഒരാൾക്ക് 50 രൂപയാണ് കെഎസ്ആർടിസി ഈടാക്കുന്നത്. മടക്കയാത്രയ്ക്കുള്ള തുകയും മുൻകൂട്ടി നൽകണം. എന്നാൽ ഇതേ ദൂരപരിധിയിലുള്ള സാധാരണ യാത്രയ്ക്ക് പരമാവധി 35 രൂപയോളമാണ് നിരക്ക്. തീർത്ഥാടകരിൽ നിന്ന് അധിക തുക ഈടാക്കുന്നത് രാജ്യത്തിന്റെ വിവിധ ഭാഗങ്ങളിൽ നിന്നെത്തുന്ന സാധാരണ ഭക്തർക്ക് സാമ്പത്തിക ബാധ്യതയുണ്ടാക്കുന്നുവെന്നാണ് അനൂപ് ആന്റണിയുടെ വിമർശനം.

ശബരിമല തീർത്ഥാടനം വിനോദയാത്രയല്ലെന്നും തിരുപ്പതി ഉൾപ്പെടെയുള്ള തീർത്ഥാടന കേന്ദ്രങ്ങളിൽ സൗജന്യ യാത്രാസൗകര്യം ലഭ്യമാകുമ്പോൾ ശബരിമലയിൽ അധിക നിരക്ക് ഈടാക്കുന്നത് അംഗീകരിക്കാനാകില്ലെന്നും അദ്ദേഹം പറഞ്ഞു. ആവശ്യത്തിന് ബസുകൾ ഇല്ലാത്തതിനാൽ നിലയ്ക്കൽ–പമ്പ റൂട്ടിൽ തീർത്ഥാടകർക്ക് മണിക്കൂറുകളോളം കാത്തുനിൽക്കേണ്ടിവരുന്നതും ബസുകളിൽ അമിതമായി ആളുകളെ കയറ്റി യാത്ര ചെയ്യേണ്ടിവരുന്നതും പരിഹരിക്കണം. കൂടുതൽ ബസുകൾ അനുവദിച്ച് സർവീസുകൾ ക്രമീകരിക്കുന്നതിനൊപ്പം കാത്തിരിപ്പിനും ബസുകളിൽ കയറുന്നതിനും ആവശ്യമായ അടിസ്ഥാന സൗകര്യങ്ങളും ഒരുക്കണമെന്നും നിവേദനത്തിൽ ആവശ്യപ്പെട്ടു.

സൗജന്യ ബസ് സർവീസ് നടത്താൻ സന്നദ്ധരായ ഭക്തജന സംഘടനകൾക്ക് സർക്കാർ അനുമതി നൽകാത്തതിലും അനൂപ് ആന്റണി പ്രതിഷേധം അറിയിച്ചു. കെഎസ്ആർടിസി അധിക നിരക്ക് കുറയ്ക്കാൻ തയ്യാറായില്ലെങ്കിൽ ഇത്തരം സംഘടനകളെ സൗജന്യ സർവീസിന് ചുമതലപ്പെടുത്തണം. തീർത്ഥാടകരുടെ യാത്രാക്ലേശം പരിഹരിക്കാൻ കേന്ദ്രസർക്കാരിന്റെ ഇടപെടൽ ആവശ്യമെങ്കിൽ ബിജെപിയുടെ പിന്തുണയുണ്ടാകുമെന്നും അദ്ദേഹം വ്യക്തമാക്കി.

മുഴുവന്‍ വാര്‍ത്തകള്‍

എനിക്ക്‌ അറിയേണ്ട വാര്‍ത്തകള്‍ എന്റെ ഫെയ്‌സ്‌ ബുക്കില്‍ സൗജന്യമായി ലഭിക്കാന്‍ ഗ്രാമജ്യോതി Facebook പേജില്‍ അംഗമാവൂ.

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്

×
Top