കേരളത്തിലെ ജനങ്ങളെ കബളിപ്പിച്ച ബജറ്റെന്ന് പ്രതിപക്ഷ നേതാവ് രമേശ് ചെന്നിത്തല

തിരുവനന്തപുരം : ധനമന്ത്രി ഡോ. തോമസ് ഐസക് അവതരിപ്പിച്ചിരിക്കുന്നത് കേരളത്തിലെ ജനങ്ങളെ കബളിപ്പിച്ച ബജറ്റെന്ന് പ്രതിപക്ഷ നേതാവ് രമേശ് ചെന്നിത്തല. നാലായിരം കോടി കയ്യില്‍ വെച്ച്‌ 50000 കോടിയുടെ പദ്ധതികള്‍ പ്രഖ്യാപിച്ച്‌ നാട്ടില്‍ വികസനം നടക്കുന്നുവെന്ന പ്രതീതി സൃഷ്ടിച്ച്‌ ആളുകളെ കബളിപ്പിക്കുന്ന സമീപനമാണ് ധനകാര്യമന്ത്രി ചെയ്തുകൊണ്ടിരിക്കുന്നത്. ധനമന്ത്രി ബജറ്റിന് പുറത്താണ് എല്ലാ വികസനപ്രവര്‍ത്തനവും നടത്തുന്നതെന്നും ചെന്നിത്തല കുറ്റപ്പെടുത്തി.

നിയമനനിരോധനം ഔദ്യോഗികമായി പ്രഖ്യാപിച്ച ധനകാര്യമന്ത്രിയാണ് തോമസ് ഐസക്കെന്നും പ്രതിപക്ഷനേതാവ് ആരോപിച്ചു. നടക്കാതെ പോയ പ്രഖ്യാപനങ്ങള്‍ക്ക് കഴിഞ്ഞ തവണ എംടിയെയാണ് കൂട്ടുപിടിച്ചതെങ്കില്‍ ഇത്തവണ സുഗതകുമാരി മുതല്‍ ബാലാമണിയമ്മ വരെയുള്ളവരെ മന്ത്രി കൂട്ടുപിടിച്ചിട്ടുണ്ട്.

ബജറ്റുമായി കിഫ്ബിക്ക് യാതൊരു ബന്ധമില്ല. ഇത്തവണയും കിഫ്ബിയെ ആശ്രയിച്ചുള്ള ബജറ്റായേ ഇതിനെ കാണാനാകൂ. 50000 കോടി രൂപയുടെ പദ്ധതിയാണ് കിഫ്ബിയില്‍ പ്രഖ്യാപിച്ചത്. എന്നാല്‍ പണം കൊടുത്തത് 335.6 കോടിരൂപ മാത്രമാണ്. കൊട്ടിഘോഷിക്കുന്ന കിഫ്ബിയുടെ പക്കലുള്ള പണം കഷ്ടിച്ച്‌ നാലായിരം കോടിരൂപ മാത്രമാണ് എന്നതാണ് വാസ്തവം.