ആമസോണും ഫ്ലിപ്കാർട്ടും ഇടിയും ഇടിവെട്ട് ഐഡിയകളും

പാളയത്തിലെ പടയും പുറത്തെ പോരുമായി ഇന്ത്യൻ ഇ–കൊമേഴ്സ് രംഗം ‘ഇടി കൊമേഴ്സ്’ ആകുന്നു. കച്ചവടം ക്ലച്ച് പിടിച്ചതോടെ വിപണിയിൽ ഒന്നാമനാകാനും ആയവർ അതു നിലനിർത്താനുമുള്ള പെടാപ്പാടിലാണ്. ആമസോണും ഫ്ലിപ്കാർട്ടും സ്നാപ്ഡീലും ഇഞ്ചോടിഞ്ചു പോരാട്ടം നടത്തുന്ന വിപണിയിൽ നേരമിരുട്ടി വെളുക്കുമ്പോഴാണ് സ്ഥാനമാനങ്ങൾ മാറിമറിയുന്നത്. ഒപ്പം പുത്തൻ കമ്പനികളുടെ രംഗപ്രവേശവും. ഇതിനെല്ലാം പുറമെ കടക്കച്ചവടക്കാരെ സംഘടിതമായി എതിരിടാൻ കൂട്ടായ്മയൊരുക്കാനും ഇ കൊമേഴ്സ് രംഗം ശ്രമിക്കുകയാണ്

കച്ചവടം 24×7

കടയിലേക്ക് ആളെക്കയറ്റാൻ പണ്ട് റീട്ടെയിൽ കച്ചവടക്കാർ കണ്ടെത്തിയ മാർഗമാണ് വാലന്റൈൻസ് ഡേ പോലുള്ള രാജ്യാന്തര ആഘോഷങ്ങളെന്ന് അസൂയക്കാർ പറയും. ഇ കൊമേഴ്സ് വ്യാപാരം പച്ചപിടിച്ചതോടെ ഏഴു ദിവസവും 24 മണിക്കൂറും കച്ചവടത്തിന്റെ ആഘോഷമാണ്. ദിവസത്തിന്റെ പ്രത്യേകത കണ്ടുപിടിക്കാൻ പറ്റാത്തപ്പോൾ ‘എൻഡ് ഓഫ് സീസൺ സെയിൽ’ എത്തും. എന്തു സീസന്റെ അവസാനമാണെന്നു ചോദിക്കരുത്. ഞായറാണെങ്കിൽ ‘സൺഡേ സൂപ്പർ സെയിലും’ തിങ്കളാണെങ്കിൽ ‘മൺ‍ഡേ മിഡ്നൈറ്റ് സെയിലും’ വരും. ഒരിക്കലെങ്കിലും സൈറ്റിൽ കയറിയവരുടെയൊക്കെ മൊബൈൽ ഫോണിലേക്കു മുറയ്ക്കു മെസേജുമെത്തും. എല്ലാവരെക്കൊണ്ടും എന്നും എന്തെങ്കിലുമൊക്കെ വാങ്ങിപ്പിക്കുക എന്നതാണു ലൈൻ! ഉടുപ്പും ചെരുപ്പും പൊട്ടും ചാന്തും മാത്രം വിറ്റാൽ രക്ഷയില്ലെന്നായതോടെ പുതുമയുള്ള ഉൽപന്നങ്ങൾ ചേർത്തു കാറ്റഗറി വിപുലീകരിക്കാൻ ഇ കൊമേഴ്സ് സൈറ്റുകൾ നിർബന്ധിതരായി. വാഹന ആക്സസറികളും ഫർണിച്ചറുകളും ബാത്റൂം ഫിറ്റിങ്സുമൊക്കെ ഈ മാറ്റത്തിൽ ഹോം പേജിൽ കയറിപ്പറ്റിയവയാണ്.