മനോരമയുടെ സര്‍വ്വേ അല്ല. ഇത് പറയുന്നത് മുന്‍ അധ്യക്ഷന്‍ ഗഡ്ഗരി കേരളത്തില്‍ നാല് സീറ്റ് – മോദി തന്നെ വീണ്ടും പ്രധാന മന്ത്രി

ന്യൂഡല്‍ഹി: പ്രധാനമന്ത്രി സ്ഥാനം തന്റെ ലക്ഷ്യമല്ലെന്നും,​ നരേന്ദ്രമോദി തന്നെയാകും അടുത്ത പ്രധാനമന്ത്രിയെന്നും നിതിന്‍ ഗഡ്കരി പറഞ്ഞു. ദേശീയതയെ രാഷ്ട്രീയ വിഷയമാക്കുന്നത് ബി.ജെ.പിയുടെ നയമല്ല. ലോക്സഭയിലേക്ക് കേരളത്തില്‍ നിന്ന് കുറഞ്ഞത് നാല് ബി.ജെ.പി എം.പിമാരുണ്ടാകുമെന്നും ശബരിമല തന്നെയാണ് പ്രധാന വിഷയമെന്നും ഗഡ്കരി പറഞ്ഞു.

‘പ്രധാനമന്ത്രിയാകണം എന്ന ഒരാഗ്രഹവും തനിക്കില്ല. തിരഞ്ഞെടുപ്പില്‍ ബി.ജെ.പിക്ക് ഭൂരിപക്ഷം കിട്ടുമെന്ന കാര്യം ഉറപ്പാണ്. മോദി തന്നെയാകും അടുത്ത പ്രധാനമന്ത്രി. ദേശീയതയെ രാഷ്ട്രീയ വിഷയമാക്കരുത്. ഞങ്ങള്‍ക്ക് ഏറെ വലുതാണ് ദേശീയത. അത് ഒരിക്കലും രാഷ്ട്രീയവിഷയമാകരുത്’ ഗഡ്കരി പറഞ്ഞു. കോണ്‍ഗ്രസ് മുക്ത ഭാരതം എന്ന ആശയത്തോട് യോജിക്കുന്നില്ലെന്നും ഗഡ്കരി വ്യക്തമാക്കി. എല്ലാ കോണ്‍ഗ്രസുകാരെയും രാജ്യത്തു നിന്ന് പുറത്താക്കണമെന്ന് അര്‍ത്ഥമാക്കുന്നില്ലെന്നും അദ്ദേഹം പറഞ്ഞു.

കേരളത്തില്‍ നിന്ന് കുറഞ്ഞത് നാല് സീറ്റുകള്‍ എങ്കിലും ബി.ജെ.പിക്ക് നേടുമെന്നാണ് പ്രതീക്ഷ. കേരളത്തില്‍ ശബരിമല തന്നെയാകും പ്രധാനവിഷയമായി ഉപയോഗിക്കുന്നത്. ഇത് കേരളത്തില്‍ ബി.ജെ.പിയുടെ കരുത്ത് കൂട്ടുമെന്നും അദ്ദേഹം പറഞ്ഞു. ജനങ്ങളുടെ വികാരം അത്രത്തോളമുണ്ട്. ഇത് വഴി ഞങ്ങള്‍ക്ക് വലിയ പിന്തുണ ലഭിക്കുമെന്ന് പ്രതീക്ഷിക്കുന്നു എന്നും ഗഡ്കരി വ്യക്തമാക്കി.